ကဆစ်သီး ကြော်ချက်


အညာကနေ အမေ တကူးတက မှာထည့်ပေးလိုက်တဲ့ ကဆစ်သီးကို စားသာစားချင်တာ ဘယ်လိုချက်ရမလဲ မေ့နေလို့ အမေက ချက်ပုံချက်နည်း စာနဲ့ ရေးပေးလိုက်ပါသေးတယ်။အညာသူမ စစ်စစ်ကြီးရဲ့ အညွှန်းအတိုင်းချက်ထားတဲ့ ရန်ကုန်သူ စစ်စ်ရဲ့ ချက်နည်းလေး ကြည့်ကြည့်ပါဦး။

ပါဝင်သော ပစ္စည်းများ
ကဆစ်သီး ၁၀ လုံးခန့်
ခရမ်းချဉ်သီး ၂ လုံး
ကြက်သွန်နီ အသေး ၁ လုံး  (ကြိတ်ထားရန်)
ကြက်သွန်ဖြူ  ၃ မွှာ (ကြိတ်ထားရန်)
ငရုတ်သီး အစိမ်းမှုန့် အနည်းငယ်
ပုစွန်ငါးပိ အနည်းငယ်
ဆား အနည်းငယ်
ဆီ အနည်းငယ်
အချိုမှုန့် အနည်းငယ်

ကဆစ်သီးဆိုတာ အပြင်ပန်းက ကြည့်ရင် ဖရဲသီး အသေးစားပုံစံလေးလိုပါပဲ။ အထဲက အသားကတော့ သခွားသီးနဲ့ တူပါတယ်။ ဒါပေမယ့် သူ့အရသာကတော့ တစ်ချို့က ချဉ်ပြီး တစ်ချို့က ခါးပါတယ်။ ဘယ်ဟာချဉ်ပြီး ဘယ်ဟာခါးလဲဆိုတာ ကိုယ့်အနေနဲ့တော့ အပြင်ကကြည့်ရင် မသိပါဘူး။ အဲဒိတော့ ဘာလုပ်ကြည့်ရလဲဆိုတော့ အခွံခွာ ထပ်ခြမ်းခြမ်းပြီး လျှာနဲ့ တို့ ကြည့်ရပါတယ်။


ကဲ စကားတွေများနေလို့ မပြီးဘူး။ စချက်ကြရအောင်။

ကဆစ်သီးကို အခွံခွာ၊ ထပ်ခြမ်းခွဲပြီးလျှာဖြင့် တို့မြည်းကြည့်ပါ။
ခါးတယ်ဆိုရင် အထဲက အစေ့တွေကို ထုတ်ပြီး၊ မခါးရင် အစေ့မထုတ်ဘဲ အခြမ်းလိုက် ချက်မယ့်အိုးထဲ ထည့်ပါတယ်။


ခရမ်းချဉ်သီး နှစ်လုံးခန့်ကို အစေ့ထုတ်ပြီး လက်ဖြင့် ဖျစ်ပြီး ခြေ ထည့်ပါတယ်။

ကြက်သွန်အဖြူအနီထောင်းထားတာကို ထည့်၊
ပုစွန်ငါးပိ အနည်းငယ်၊ ငရုတ်သီး အစိမ်းမှုန့် အနည်းငယ်၊ ဆီ၊ ဆား၊ အချိုမှုန့် (စားသုံးလျှင်) အနည်းငယ်ထည့်ပြီး လုံးချက်ပါ။

ငရုတ်သီးအနံ့ ပျောက်သည်အထိ လုံးချက်ပြီး ရေအနည်းငယ်ထည့်ကာ ကဆစ်သီးနူးသည်အထိ တည်ပါ။
ကဆစ်သီးနူးပြီး ဆီကျန် ရေကျန် အနေအထားတွင် ဟင်းအိုးမီးဖိုပေါ်မှ ချလို့ရပါပြီရှင်။


ချက်ပုံချက်နည်း တစ်နေရာနှင့်တစ်နေရာ ကွဲနိုင်သေးပေပမယ့် ဒီနည်းကတော့ ကိုယ်တို့ အညာအိမ်က အိုးသူကြီး အဒေါ်ရဲ့ ချက်နည်းပါ။

ရွာမှာဆိုရင်တော့ ဗူးရွက်ဟင်းချို၊ အမဲကြော်၊ ကဆစ်သီးဟင်း၊ ငရုတ်သီးထောင်းဆိုလို့ကတော့ ထမင်းဝိုင်းထဲ စကားမပြောတမ်း ခေါင်းငုံ့လွေးကြတာ ထမင်းဝိုင်းဘေးချထားတဲ့ ထမင်းအိုးထဲက ထမင်း အမြဲ ပြောင်တလင်းခါစမြဲပါ။

သူများတွေ ကြိုက်မကြိုက်ထက် ကိုယ်ကတော့ ဒီဟင်းလေးစားမိတိုင်း အညာမှာနေခဲ့ရတဲ့ အချိန်လေးတွေကို ပြန်ရောက်သွားသလိုပါပဲ။ ပြောရင်း စားချင်လာပြန်ပြီ။




No comments:

Post a Comment

Penang 4D3N Free & Easy - Intro

ပီနန်ကျွန်း၊  မလေးရှားနိုင်ငံ။ အောက်တိုဘာ ၆ ရက်မှ ၉ ရက်။ စနေ၊ တနင်္ဂနွေ၊ တင်္နလာ၊ အင်္ဂါ။ ဒီလိုတွေ စီစဉ်ကြတာ။ ဒီခရီးကတော့ သွားခါနီး ၂ ရက်အ...