cameron highlands လက်ဖက်ခင်း
ပထမဆုံးသွားတာက BOH လက်ဖက်ခင်းတွေပါ။ တောင်ပေါ်ကို အနည်းငယ်တက်ရပါတယ်။ ဒီခရီးကို လာချင်တဲ့အကြောင်းနှစ်ခုမှာ ဒါ တစ်ခုပါ။ တစ်ခုကတော့ လဗန်ဒါရူးဆိုတော့ လဗန်ဒါ ပန်းခင်းပေါ့။ တစ်မျှော်တစ်ခေါ်ကြီး ကတ္တီပါ အစိမ်းကြီးခင်းထားသလို စိမ်းနေတဲ့ လက်ဖက်ခင်းတွေက မျက်စိအေးစေပါတယ်။ တိုးဂိုက်တစ်ဖြစ်လဲ ကားသမားကပဲ လက်ဖက်ပင်တွေအကြောင်း ရှင်းပြပါတယ်။ ကင်မရွန်းဟိုင်လန်းမှာ လက်ဖက်ခင်းတွေအများကြီး မျက်စိတစ်ဆုံးဆိုပေမယ့် တကယ်တန်း အများဆုံး ပိုင်တာက ပိုင်ရှင်နှစ်ယောက်ပဲ ရှိပါတယ်။ တစ်ယောက်က BOH လက်ဖက်စိုက်ခင်းကို ပိုင်ပြီး နောက်တစ်ယောက်က Cameron Valley စိုက်ခင်း ပိုင်ရှင်ပါ။ BOH လက်ဖက်စိုက်ခင်း က ပိုကြီးပြီး စုစုပေါင်း ဧက ၈၀၀၀ ရှိပါတယ်။ လက်ဖက်ပင်က မြေသြဇာလည်း ကျွေးဖို့မလို၊ ရေလည်း လောင်းဖို့မလိုပါဘူး။ တောင်ပေါ်ဒေသရဲ့ သဘာဝမြေ၊ အေးမြတဲ့ ရာသီဥတုက လက်ဖက်ပင်တွေကို အလိုအလျောက် ရှင်သန်စေပါတယ်။ ဒါဆို လက်ဖက်ပင် ရှင်သန်ဖို့ ဘာလုပ်ပေးရလဲဆိုတော့ လက်ဖက်ပင်တွေကို အမြင့်ကြီးဖြစ်မလာအောင် ညှပ်ပေးရတာပါ။ တကယ်လို့ မညှပ်ပေးခဲ့ဘူးဆိုရင် လက်ဖက်ပင်ဟာ ကုက္ကိုပင်လို အပင်ကြီးတစ်ပင်အဖြစ် ကြီးထွားလာပါလိမ့်မယ်။ ဒါကြောင့် လက်ဖက်ပင်တွေကို ၃ ပေခန့်အမြင့် ချုံပင်လို့ ထင်ရစေပါတယ်။ လက်ဖက်ခူးနေတဲ့ အလုပ်သမားတွေက အများအားဖြင့် ဘင်္ဂလားဒေ့်ရ်ှက လို့ သိရပါတယ်။
ကြည့်လေရာရာ လက်ဖက်ပင်များ
အဲဒိ ညှပ်နဲ့ ထိပ်ကလေးတွေကို ခူးပြီး နောက်က တောင်းထဲ ထည့်ကြတယ်
ခူးပြီးသား လက်ဖက် အိတ်
လက်ဖက်ခင်းမှ အလုပ်သမားများ
ဒီလမ်းလေးတွေကနေ ကားက ဟိုဘက်ကွေ့လိုက် ဒီဘက်ကွေ့လိုက် မြင်မြင်သမျှ လက်ဖက်ခင်းတွေချည်းပဲ
လက်ဖက်ခြောက်ထုတ်လုပ်ပုံထဲမှ အဆင့်တစ်ခု
BOH မှ ရေနွေးကြမ်း
BOH tea shop မှ လှမ်းမြင်ရသော မြင်ကွင်း
အဲဒိနောက် တောင်ရဲ့ အမြင့်ဆုံးနေရာထိကားနဲ့ ဆက်တက်ပြီး ကားသမားက လမ်းလျှောက်ဖို့နေရာ နှစ်နေရာ ရွေးခိုင်းပါတယ်။ တစ်နေရာက ရေညှိတော (mossy forest) လမ်းနဲနဲကြမ်းမယ်၊ ရွံ့နဲနဲပေမယ်၊ တက်ရဆင်းရတာတွေ များမယ်။ နောက်တစ်နေရာက သစ်သားတံတား အတိုင်းလမ်းလျှောက်ပြီး ရေကန်ရှိမယ်လို့ ပြောပြီး လူခွဲပါတယ်။ သူကတော့ ခက်ခဲတဲ့ ရေညှိတောကို လမ်းပြအနေနဲ့ လိုက်ပြီး သစ်သားတံတား လျှောက်မယ့်သူတွေကိုတော့ စလျှောက်ရမယ့် နေရာပြပြီး ပြန်စုရမယ့်အချိန်ပြောပါတယ်။
Mossy Forestကိုယ်တို့အဖွဲ့တစ်ဖွဲ့ပဲ ရေညှိတောကိုရွေးပြီး ကျန်တဲ့သူတွေအားလုံးက သစ်သားတံတားကို ရွေးပါတယ်။
တောတစ်တောလုံး သစ်ပင်တွေမှာ ရေညှိပင်တွေ ပေါက်နေပြီး မြေကြီးလို့ မရှိတော့ဘဲ သစ်မြစ်တွေမှာကပ်နေတဲ့ ရေညှိတွေကို နင်းသွားရတယ်။ နင်းတိုင်း အိအိသွားပြီး တစ်ချို့နေရာတွေမှာ ရွံ့တွေ စိမ့်ထွက်လာပါတယ်။ လူသွားပါများလို့ လမ်းဖြစ်ပေမယ့် လမ်းက အဖြောင့်တော့လည်းမဟုတ်။ ဒီသစ်ကိုင်းခွကျော်၊ ဟို သစ်ကိုင်းခုန်ကူးနဲ့ အပေါ်တက် အောက်ဆင်း သွားရတာပါ။
Pitcher Plant (ရေတကောင်းပင်)
ငယ်ငယ်တုန်းက စာထဲသင်ရတဲ့ ရေတကောင်းပင် (pitcher plant) တွေလည်းတွေ့ရပါတယ်။ လက်ထည့်ကြီးရင် အဖုံးပိတ်သွားမလားဆိုပြီး ထည့်ကြည့်လိုက်သေးတယ်။ ပြန်ဆင်းတဲ့လမ်းက တော်တော်မတ်ပါတယ်။ အေးမြတဲ့ရာသီဥတုမှာ နေရိပ်မထိုးတဲ့ တောအုပ်ထဲ လမ်းလျှောက်ရင်းချွေးတွေတောင် စို့လာပါတယ်။ဘာအားကစားမှ လုပ်လေ့ရှိသူမဟုတ်တော့ မောလည်းအတော်မောပါတယ်။
ဒီလို တက်ရင်းလည်း ဓာတ်ပုံရိုက်လိုက်သေးတယ်
သစ်ပင်တွေကြားထဲ ခေါင်းငုံ့ပြီးသွားရတာ ကစားနေရတာကျနေတာပဲ
ရေညှိတော တစ်နေရာ
ဒီလမ်းအတိုင်းပြန်ဆင်းခဲ့ရတယ်
တောင်ပေါ်ကဆင်းလာပြီး လိပ်ပြာဥယျာဉ်ကို သွားကြပါတယ်။ သံဇကာတွေ ကာထားတဲ့ ပန်းခင်းထဲမှာ လိပ်ပြာရောင်စုံ အရွယ်စုံကို ထည့်ထားတာပါ။ ၀င်ဝင်ချင်း လိပ်ပြာလေးတွေ အများကြီးတွေ့ရပြီး ပန်းတွေပေါ်မှာ နားနေတဲ့ သူတို့နားကို ကပ်သွားတာတောင် ထမပျံလို့ ၀မ်းသာသွားပေမယ့်၊ ခဏအကြာ သတိထားမိတာက သူတို့ကို လက်နဲ့ထိတာတောင် ပျံမသွားဘဲ ဒီပန်းပေါ်မှာမှာ တွယ်ကပ်နေကြတာပါ။ စိတ်အထင်တော့ ပန်းပေါ်မှာ သူတို့ စွဲလန်းစေတဲ့ တစ်ခုခု ထည့်ထားတယ်လို့ ထင်မိပါတယ်။ တစ်ချို့ လိပ်ပြာတွေကတော့ လွတ်လွတ်လပ်လပ် ပျံသန်းနေပြီး လူအနားကပ်မခံပါဘူး။ အဲဒါမှ ပုံမှန်လို့ ထင်ပါတယ်။
ပန်းနဲ့လိပ်ပြာ
ဘာလိပ်ပြာခေါ်လဲမသိ
ဒီလိပ်ပြာကတော့ အလှပြနေသလားမှတ်ရတယ်။ အနားဘယ်လောက်ကပ်ကပ် သူမမှု
ဒါကတော့ သူရိုက်ထားတဲ့ အကြိုက်ဆုံးပုံထဲက တစ်ပုံ
ဒါက နောက်တစ်ပုံ
အဲဒိနောက် ဟိုတယ်ကို ပြန်ပို့ပေးပါတယ် ။ ပိုက်ဆံနဲနဲလိုနေတာနဲ့ အနားက money changer မှာ ထပ်လဲရပါသေးတယ်။ နေ့လည်စာကိုတော့ ဟိုတယ်နားက ဆိုင်တစ်ဆိုင်မှာပဲ အိန္ဒိယစာစားခဲ့ပါတယ်။ ဟိုတယ်မှာ တရေးတမော ပြန်အိပ်ပြီး ညနေမှာ တက်စီနဲ့ ညဈေးကိုသွားပါတယ်။ ကံဆိုးစွာပဲ မိုးဖွဲဖွဲကနေ ညဈေးအရောက်မှာ မိုးစိပ်စိပ်ဖြစ်လာပါတယ်။ ထီးလည်းမပါကြတာနဲ့ သုပ်သုပ်သွား၊ သုပ်သုပ်ကြည့်၊ သုပ်သုပ်ဝယ်ပြီး ပြန်ဖို့ ပြင်ရပါတယ်။ အဲဒိက ပျားရည်ဝယ်ခဲ့ပါသေးတယ်။ ညစာစားဖို့ကို ညဈေးတန်းနားက ဆိုင်တွေထက် လမ်းမှာတွေ့ခဲ့ရတဲ့ မီးတွေထိန်လင်းတဲ့ ဆိုင်အကြီးကြီးကို မျက်စိကျကြပါတယ်။ တက်စီငှားပြီး အဲဒိဆိုင်ကို ပို့ခိုင်းပြီး ညစာကို steamboat ကြပြန်ပါတယ်။ ဆိုင်ကကြီးပြီး စားပွဲထိုးက နည်းတော့ ဆိုင်ရောက်ပြီး အတော်ကြာတာတောင် မှာလို့မရပါဘူး၊ စားပွဲပေါ် စားစရာ ရောက်လာဖို့ကို စုစုပေါင်း နာရီဝက်လောက်စောင့်လိုက်ရပါတယ်။
လူ ၃ ယောက်စာ မှာတာ အဲလို အရေအတွက်နဲ့ လာချပေးတာပါ (ပုစွန် ၃ ကောင်၊ ကြက်ဥ ၃ လုံး)
အရွက်တွေ လတ်ဆတ်တာတော့ ကြိုက်ပါတယ်။ အဲဒိ အသားလုံးတွေ အသားပြားတွေ မကြိုက်။
နောက်နေ့တော့ မနက် ၉ နာရီခန့် တာနာရာတ ဘက်စကားဝင်းထဲကနေ အီပိုး၊ အီပိုးကတဆင့် စင်ကာပူကို ပြန်ခဲ့ကြပါတယ်။
3D2N Cameron Highlands Trip - နိဒါန်း
3D2N Cameron Highlands Trip - Day 1
.JPG)
No comments:
Post a Comment